ຮ້ານຊາລີແມ່ນຮ້ານໜັງສືອິດສະຫຼະທີ່ຕັ້ງຢູ່ໃນມຸມໜຶ່ງຂອງແຂວງສະຫວັນນະເຂດ. ເປັນຮ້ານນ້ອຍໆທີ່ຖືກລິເລີ່ມດ້ວຍຜູ້ຍິງໂຕບໍ່ນ້ອຍຄົນໜຶ່ງເຊິ່ງຮັກແພງໜັງສືເຊັ່ນດຽວກັບທຸກຄົນທີ່ແວ່ວຽນເຂົ້າມາຢ້ຽມຢາມຮ້ານ.

ຕົ້ນຕໍຈຸດກຳເນີດຂອງຮ້ານແມ່ນຍ້ອນກັບໄປຫຼາຍປີກ່ອນເມື່ອເຈົ້າຂອງຮ້ານຍັງເປັນນັກຮຽນຢູ່. ດ້ວຍຄວາມທີ່ຍຸກນັ້ນສື່ອອນໄລນ໌ຫຼືໂຊຊຽລເນັດເວີກຍັງບໍ່ທັນໄດ້ພັດທະນາແລະເຂົ້າເຖິງງ່າຍດັ່ງປັດຈຸບັນນີ້,​ ການຈະຫາໜັງສືເຫຼັ້ມໜຶ່ງມາອ່ານນັ້ນແມ່ນຕ້ອງໄດ້ເດີນທາງໄປໄກເກີນກວ່າທີ່ເດັກນ້ອຍຄົນໜຶ່ງຈະສາມາດໄປເອງໄດ້ງ່າຍໆ. ‘ຫາກມີຮ້ານໜັງສືຈັກຮ້ານຢູ່ໃນໂຕເມືອງທີ່ເຮົາສາມາດແວ່ຫຼັງເລີກຮຽນໄດ້ກໍຄົງຈະດີ’ ເປັນຄວາມຄິດທີ່ລອຍຢູ່ໃນຫົວຂອງລາວບໍ່ເຄີຍຈາງຫາຍ. ຫຼັງການປ່ຽນຜັນຂອງລະດູການໄປຫຼາຍຮອບ, ແຜນການເພື່ອຕອບສະໜອງຄວາມໂຫຍຫານັ້ນຈຶ່ງໄດ້ເກີດຂຶ້ນ. ຜ່ານວັນເວລາອັນຍາວນານສຸດທ້າຍຄວາມຕັ້ງໃຈດັ່ງກ່າວກໍໄດ້ກໍ່ໂຕເປັນຮູບຮ່າງທີ່ຊື່ວ່າ ChatLit.

ChatLit ອ່ານວ່າ ຊາລີ ມາຈາກພາສາຝຣັ່ງ; Chat ແປວ່າ ແມວ ແລະ Lit ແປວ່າ ອ່ານ, ພໍເອົາມາລວມກັນແລ້ວກໍຈະໄດ້ ຊາລີ ທີ່ແປວ່າ ແມວອ່ານ—ບໍ່ຕ້ອງບອກກໍຮູ້ເລີຍວ່າເຈົ້າຂອງຮ້ານມັກແມວຊ່ຳໃດ. ແລະມັນຍັງໄປຄ່ອງກັບຊື່ຄົນ ຊາລີ ອີກດ້ວຍ! ລຽບງ່າຍແລະໜ້າຮັກສົມກັບເປັນຄວາມຄິດຂອງນັກຮຽນໂຕນ້ອຍໆເລີຍວ່າບໍ :)

ສຳລັບເຈົ້າຂອງຮ້ານ ຮ້ານໜັງສືບໍ່ແມ່ນແຕ່ພຽງສະຖານທີ່ໄວ້ເພື່ອຊື້ຂາຍປຶ້ມເທົ່ານັ້ນ. ແຕ່ມັນຄືວັດທະນະທຳທີ່ແອບແຝງຢູ່ເທິງຊັ້ນວາງໃນຮ້ານ, ເປັນບ່ອນຄົ້ນຫາຄຳຕອບສຳລັບຄຳຖາມບາງຢ່າງທີ່ຢູ່ໃນໃຈ, ເປັນບ່ອນພັກຜ່ອນເມື່ອໂລກອ້ອມໂຕເລີ່ມໝຸນໄວຈົນເກີນໄປ ແລະເປັນສະຖານທີ່ພົບປະຜູ້ຄົນເຊິ່ງຕ່າງກໍແວ່ວຽນມາດ້ວຍຈຸດປະສົງອັນດຽວຫຼືແຕກຕ່າງກັນ. ບາງຄົນເຂົ້າມາໂດຍທີ່ມີໜັງສືທີ່ຕ້ອງການໃນໃຈຢູ່ແລ້ວ ແຕ່ບາງຄົນກໍເຂົ້າມາເພື່ອທຳຄວາມຮູ້ຈັກກັບໜັງສືໃໝ່ໆ.